Sorina aka Flooze

Dis ‘n feit dat haar unieke skitter-glitter klanke die kômmin in jou uitbring en haar pittige skerpsinnigheid is so aansteeklik soos waterpokkies in ‘n koshuis.

Regoor die land leer dié blonde BLIENGMASJIEN vir al haar tjommas die Djokovic Dans op die maat van haar treffende treffer Die Tennis Tune. Jy ken haar dalk nét as die “Hoezit my tjomma” Flooze wat jonk én oud vermaak en laat lag, maar glo dit of nie, daar is ‘n dinamiese dame genaamd Sorina ágter die masker van die Flooze wat, met ‘n meestersgraad in Regte agter haar naam, mense verras met haar ernstigheid en haar opregte menswees en wat al meer geliefd raak op vertonings soos dames-oggende, feeste en privaat funksies. Dis veral met haar “Sorina” album HOOFLETTERS waar sy Flooze se kenmerkende rooi leerbaadjie uittrek en as Sorina mense verbaas met haar mooi sangstem en goeie skryfvernuf.

As Sorina het sy onlangs ook haar veelsydigheid as vermaaklikheidster verder uitgebrei toe sy in die skoene van televisie aanbieder gestap het om saam met Kyknet se realiteitsprogram ONS SPROKIESBRUILOF die land se stralende bruide af te neem op hulle groot dag.

Kunstenaar. Sepiester. Aktrise. Sangeres. Komediant. TV aanbieder. Seremoniemeester. Liedjieskrywer. Maar van almal is die grootste en belangrikste titel vir haar die ene wat haar klassifiseer as “Mamma”. As Mamma van twee besige woelwaters Braambossie (4) en Miana (2) weet sy ook hoe dit voel om in Mamma-wees se spesiale, dankbare en nederige pantoffels te loop.